Heb 2 | WSK | STEP | Buta se, ana den ikiman mu ilukuawunak ale karo tunakko, umu te asele ana me nguala sipa nama sarenga namanakko.

Hebrews 2

Ana den nunguning ilukuawunakko

1 Buta se, ana den ikiman mu ilukuawunak ale karo tunakko, umu te asele ana me nguala sipa nama sarenga namanakko. 2 Anananga girigir alo Kaem ko den engel alo nuguring te taman mu nunguningta, se sokel ago. Se awiriya den mu buring tuikaso, ale me karo tuikaso, mu ko koma memek tokaso. 3 Se ana Kaem te nanga sangaru taukko ura biya beteram mu ko me ikinak, yam nabiring tunak, mu ana memek me tanak e? Mu ana tanakkowo! Kari Biya Jesus kota giram Kaem nanga sangaru taukko mu ko den mu balam. Se kari den mu ikiman mu anananga manorman ale den mu nunguningta maman. 4 Se Kaem betela den mu sokel tuokko kilek duap duap sokel ago la bitakaso, ale kota ko ikia te Korang Bur ko munan sokel kariimet nungaru gurugukaso. ^{▼▼Heb 2:2-4 Sinar ta ko den: Heb 10:29; 12:25. Kari Biya kilek sokel ago bitakaso: Mark 16:20.}

Jesus mu anananga Sangaru Ta Ko Kari bagoso

5 Ali iru aratukko ko baluwasan mu engel bitarmonko Kaem me balam. 6 Mena. Mu nu kariimet bitarmonko balam. Se batoga bo iwita baluwoso:

“O Kaem, ana kariimet yam, bare awuk se ni nanga bitarsam, nanga sinar tasam?
7 Ni engel alo nunup biya bita nungarem,
ale nobowa ningi ana nainip nikitang karogo nanga beterem.
8 Ale mel suen biya nanga nasiwik duap ningi awu saperem.” ^{▼▼Heb 2:6-8 Psalm 8:4-6. Genesis 1:28 ago arikko.}
Den mu te ana ikisan Kaem mel suen la ana kariimet nasiwik duap ningi awuram, se mel bo ta ana nabowa ningi me bagara iwita me bagoso. Bare ana aitak tom imi te mu ana kariimet mel suen biya bitarsan se me arigisan. Mena. 9 Bare ana Jesus arigisan! Nu kariimet nunga ikup giokko se tom tukunangta ko, engel nobowa ningi baga se ikup yaman tam ale kueram. Se umutang ko Kaem nup biya nikitang ago mu tuam. Kaem gomang biyala nangaram se Jesus ana kariimet lilim la nago ko kueram.

10 Kaem mel suen biya beteram se mu noko la. Se noko ikia mu nu kariimet suen biya nunga giok, ko kuriang ko nunga awurok, se ko nikitang te ilak bagomonko. Se nu munan diram la beteram ale Kari nunga sangaru taukko mu ko yaman ikup gikaso mu te nunga gira kari nunguning ko beteram. ^{▼▼Heb 2:9-10 Jesus nup biya tam: Phil 2:8-9. Bare nu giram ikup yaman tam: Heb 5:8-9.}

11 Se awiriya Jesus ko ura beteram mu te kako nunguningkiri ko nunga awuram, mu aitak noko Nuet mu nononga Nonet tala. Umutang ko Jesus mu nononga baluk ale noko launuria ko ma nunga balukko mu ko me doloso. 12 Nu balso:

“O Kaem, ani ka nip, ka dugu duap aga launuria nunga manikko;
ale biguwura ningi ka nip patawirikko.” ^{▼▼Heb 2:11-13 Jesus anananga balso noko launuria maso: Psalm 22:22; Mark 3:35; John 20:17; Isaiah 8:17-18.}
13 Ale aking balam:

“Ani Kaem ko angamang ningi nunguning arukko.”
Ale akingtala balam:

“Ani kuriang Kaem aisam mu arungu bagasam iweya.”
14 Se kuriangari umutang mu kariimet nungumik guang karogo marak bagasan borta nunga balso. Buta se Jesus nononga turan tala kari ko aratam, nu kueruk mu te kari memek Satan, kuera ko sokel iluwaram, mu ko sokel menawurok ale, 15 kariimet tom suen biya kuera ko nguanga se bagaman mu nunga sangaru taukko kari ko aratam. 16 Mu nu engel alo nunga sangukko mena. Nu Abraham ko taleng girigir alo nunga sangukko se.

17 Buta se, nu munan suen biya te ko launuria nunga iwitatala kari ko aratam, nu te gomang lila se gomang tua ko Priest Supuling ko aratuk ale, Kaem koma dugu te ko ura ninguru bitiruk se Kaem nunga memek siwurokko. 18 Nu kota ira ariga ko ikup yaman saki kote aratukaso, bare nu am sokel ago bagakaso. Umutang te, nu kariimet ira ariga nongote aratoso mu, nu nunga sangukko terong mam. ^{▼▼Heb 2:17-18 Jesus yaman ikup gikaso: Heb 4:15.}